Ֆինանսական գրագիտություն մոդուլը HoT Վիրտուալ քոլեջի թվով չորրորդ մոդուլն էր, որը մեկնարկեց 2022թ. հոկտեմբերի 26-ին։ 

Ֆինանսական գրագիտությունը գիտելիքների ու հմտությունների ձեռք բերման գործընթաց է, որն օգնում է իմանալ, թե որտեղից է սկսվում եկամուտ ունենալու ճանապարհը, ինչ որոշումներ են կայացնվում այդ ճանապարհի յուրաքանչյուր խաչմերուկին՝ ունենալով սահմանափակ ռեսուրսներ, ինչպես արդյունավետ տնօրինել ու կառավարել սահմանափակ ռեսուրսները և ինչպես անընդհատ ավելացնել դրանք։

Ֆինանսական գրագիտություն մոդուլը ներառում էր հիմնականում անձնական ֆինանսների և անհատի ֆինանսական որոշումների կայացման գործընթացի կարևոր տարրերը՝ ներկայացնելով դրանց իմաստային ու օգտագործման սխեմաները:  Մոդուլի նպատակն էր ծանոթացնել մասնակիցներին առօրյայում օգտագործվող տնտեսագիտական հասկացությունների և դրանք առավել արդյունավետ գործածման ձևերի հետ՝ տրամադրելով տեսական մատչելի գիտելիքներ և դրանց գործնական կիրառման ձևերը: Վերջիններս հիմնված են ՀՀ-ում առկա գործիքների և գործընթացների վրա:

Ֆինանսական գրագիտություն մոդուլը դասավանդեց Արմենուհի Հովակիմյանը՝ մասնագիտությամբ տնտեսագետ, ով աշխատանքային գործունեությունն իրականացնում է ֆինանսական ոլորտի կապիտալի շուկայի ուղղվածությամբ: 2017 թվականից հանդիսանում է Եվրո-Ասիական Ֆոնդային Բորսաների Միության գլխավոր քարտուղարի տեղակալը: 

Վեց շաբաթների ընթացքում ուսանողներին տրամադրվեցին վիդեոդասեր և անցկացվեցին ամենշաբաթյա ինտերակտիվ հանդիպումներ: Մոդուլի ուսումնական ծրագիրը կազմված էր այնպես, որ մոդուլն ավարտելով մասնակիցը.

• կկարողանա կազմել անձնական բյուջե և կազմակերպել պարզագույն ֆինանսական պլանավորում, 
• կկարողանա կատարել պարզագույն տնտեսագիտական հաշվարկներ և գործողություններ, 
• պատկերացում կկազմի ֆինանսական կազմակերպությունների տարբեր տեսակների գործունեության մասին, 
• կծանոթանա ֆինանսական աշխարհի նոր գործիքների և դրանց փիլիսոփայության հետ, 
• կկարողանա կիրառել տնտեսագիտական գործիքները (ֆինանասական կազմակերպությունների կայքեր, ծրագրեր), 
• կկարողանա կարդալ և հասկանալ տնտեսական վիճակագրություն:

  Ընդհանուր առմամբ այս մոդուլի շրջանակում HoT  Վիրտուալ քոլեջի ուսանողները հանձնել են 5 ընթացիկ և 1 ավարտական թեստ: